الثلاثاء، 9 فبراير 2010

التعليم و نظرية الكرسى و الكنبة


مقالاتى السنباطية اللوذعية




مقالات . . . طب و ليه لأ . . . جايز أكون مكتبتهاش قبل كده . . . بس على إعتبار إنى جربت فيكم القصة القصيرة و الخاطرة فمعلش استحملونى كمان شوية و مجتش على دى :D :D :D . . . و خلينا متفقين من الأول لو معجبتكمش حتقولوا إيه . . . كفااااييية حرااااااام . . . بس محدش يحدف طوب لو سمحتم . . . ربنا يستر و تعجبكم . . . 



1

التعليم و نظرية الكرسى و الكنبة




ليه بنقول عليها Active علشان هى Reactive !!! ... يا سلام كلام مقنع جداً . . . تقريبا دى تانى حاجة أسمعها فى المحاضرة دى و ده بعد مرور 21 دقيقة من بدايتها . . . أول حاجة ركزت فيها كانت عنوان المحاضرة و هو "Nitrogenous Compounds" اللى كانت مكتوبة غلط و بقت "Nitrogeous" . . . أنا راضى ضميركم العلمى و الأدبى و العلمى المتأدب إيه الدافع اللى ممكن يخلينى أكمل فى المحاضرة و أركز معاها ؟؟؟ . . . فين المصداقية بتاعت اللى بيحاضر لما هو يغلط فى كلمة Nitrogenous . . . و يفضل كاتبها غلط و ميصلحهاش و يشرحها كام مرة بنفس غلطاتها . . . النكتة بقى إن المحاضر هو اللى بيحط الإمتحان و هو اللى بيصحح . . . طب يا ترى لو كتبتها فى الإمتحان nitrogeous هيحسبها صح على اساس أنه كتبها بالشكل ده وللا غلط عشان هى غلط . . . طب لو كتبتها Nitrogenous مش ممكن يحسبهالى غلط عشان هو مكتبهاش كده ؟!؟!؟! . . . الكلام ده بيرجعنا لنظرية شهيرة فى أساليب التعليم و التدريس فى مصر . . . نظرية "الكرسى و الكنبة" !!! النظرية دى بتقول إن فى مصر مفيش حاجة اسمها علم و إن اللى بندرسه ده نسبى حسب اللى بيدرس فالمعلومة الصحيحة هى اللى بيقولها اللى بيشرح حتى لو كانت خاطئة . . . ليه ؟؟ عشان هو اللى بيمتحننا و حناخد منه الدرجات . . . يعنى مثلا لو دخلت إمتحان شفوى و قعدت على كرسى و أتسألت أنت قاعد على إيه؟ . . . أوعى تتسرع و تقوله كرسى . . . أسأله الأول حضرتك شايفه إيه؟ . . . حيقولك كنبة . . . تبقى كنبة هى الإجابة الصحيحة . . . و لو حبيت تعمل فيها عم المبادىء وثابت على مبدأك و قلتله كرسى يبقى حضرتك هتنضرب بالكرسى - قصدى الكنبة - و حتيجى السنة اللى وراها تقعد على نفس الكرسى - الكنبة - و تتسأل نفس السؤال . . . طب و بعدين إحنا كده مش هنتعلم حاجة . . . طب ومين قالك إننا بنتعلم أصلا . . . التعليم ده حاجة بتتعمل فى الدول التانية عشان تتقدم و تطلع لقدام . . . إنما إحنا بنرجع لورا فبالتالى مش محتاجين نتعلم خالص و بنعمل حاجة تانية غيره . . . ممكن نسميها التعقيم بمعنى أنك تعقم دماغ الطالب من المعلومات و الأفكار و نخليها معقمة مفيهاش أى Microorganisms تخليه تفكر و العياذ بالله . . . فقت تانى على صوت المحاضر و هو بيتكلم عن الـIsomers للـNitrogenous compounds . . . بصيت عالكشكول . . . إيه اللى أنا كتبته ده . . . أكيد كل ده بسبب التكييف اللى أنا قاعد تحته هو اللى سقعلى دماغى و بوظهالى . . . منك لله يا تكييف . . . أستعذت بالله من الشيطان الرجيم و التكييف و حاولت أركز فى بقيت المحاضرة و إنى أتحول لكائن حى أخر غير أدمى يتميز بديل طويل و أذنين أطول . . . من أجل الدرجات.