الجمعة، 27 فبراير 2009

من على أول السطر . . . مذكرات طفل برىء 9


مذكرات طفل برىء


حلقات غير مسلسلة من الذاكرة نعيش معها أيام الطفولة البريئة . . . أحيانا (؛

عندما تشتد المحن و الأزمات ، تطفو على السطح بعض الذكريات . . حلوة . . مرة . . مضحكة . . محزنة . . . تننتزع الأهات أو الضحكات . . . عندها أتذكر إبتسامات طفل برىء ولى عليه الدهر و فات !!!!


9


من أول السطر . . . و هو فين السطر ؟ ؟ ؟




من أول السطر . . . سمعت الكلمة دى فين قبل كده . . . ركز شوية و ارجع بذاكرتك لورا تمن عشر سنين كده . . . افتكر أيام الإبتدائى . . . الله ينور عليك فى حصص الإملاء . . . فكر الحصة دى كانت بتبقى مرة واحدة كل أسبوع . . . و كنت لازم أغلطلى كل مرة غلطة وللا غلطتين . . . و تقريبا كل الناس كانت بتغلط نفس الغلطة . . .الهمزات كانت معذبانى يا ترى الهمزة دى على سطر وللا على نبرة و للا على الواو وللا على الياء ؟؟؟؟ . . . أفتكر مرة فى الإملاء كان فى كلمة لآلىء - جمع لؤلؤة - و كانت كارثة كونية محدش عرف يكتبها صح خالثثثث . . . والله المدرسين دول بيصعبوا عليا لو يشوفوا اللغة اللى إحنا بتكتب بيها دلوقتى مكانوش علمونا من أساسه



نرجع بقى لموضوعنا بتاع السطر . . . كانوا على طول يقولونا نقطة و من أول السطر . . . الكلمة دى كانت بتغيظنى أوى عشان و إحنا صغيرين كنا بنكتب فى كراسة 9 سطور فاكرينها . . . و أنا و الحمد لله خطى كان ضخم الجثة طويل القامة عريض المنكبين شلولح . . . و كنت بكتب السطرين فى 4 سطور و نص . . . و لما كانت المدرسة و هى بتمللى تقول نقطة و من أول السطر أكون أنا كاتب كلمة واحدة بس فى السطر و أكتب بقى بعديها النقطة و أتحسر على بقيت السطر اللى سبته فاضى و مكتبتش فيه . . .و يا سلام بقى لو كانت الإملاء 3 فقرات و كل فقرة سطرين كنت بكتبها فى صفحة و نص و انا مبحبش أكتب فى أكتر من صفحة واحدة معرفش ليه البخل ده بس لما كنت بخلص  و أبص على اللى كتبته ألاقى فى سطرين كل واحد كاتب فيهم كلمة واحدة بس و الصفحة التانية مكتوب فيها سطرين بس ساعتها كنت بتقهر على إهدار المال العام فى الورق بتاع الكراسة


و من ساعتها و أنا عندى عقدة من السطور بكل أشكالها . . . يعنى كراسة الإنجليزى اللى فيها سطرين فوق بعض دى كنت مليش دعوة بيهم خالص انا كنت بستخدمهم عشان الكتابة كلها تبقى فى مستوى و احد ولا تطلع فوق و لا تنزل تشرب من البحر . . . و فى كراسة العربى فحدث ولا حرج كنت بكتب فوق السطر و تحت السطر و بين السطور لدرجة إن كان فى مدرس على طول يقوللى يا سنباطى السطور دى أخترعوها عشان تكتب عليها مش تسيبها و تكتب فى النص 


كل الأسباب اللى فاتت دى خلتنى أفكر - و دى حاجة نادرة من ساعة ما دخلت كليتنا الموقرة - أيام زمااااااااان فى عصر الفراعنة كانوا بيشدوا خط قبل ما يكتبوا على الطوب ؟؟؟ . . . يعنى حد فيكم عمره شاف قبل كده جدار فى معبد عليه خط و الكتابة فوقه الصراحة منظر تحفة . . . وبعدين الكاتب المصرى الجالس القرفصاء حد سمع إنه كان بيكتب فى كشكول بردى مسطر أو حتى مربعات


طب سيبكم من الفراعنة و خلينا نبص للمستقبل تخيل كده حفيدك - ده إذا كنت محظوظ و أتجوزت و خلفت وولادك كبروا و أتجوزوا و خلفوا و انت لسه عايش ! - و هو قاعد بيكتب الواجب بتاعه على الكمبيوتر مفيش سطور فى الورد و تقريبا هو عمره ما حيشوف سطور فى حياته


يبقى كده أنا أثبت بالدليل القاطع إن السطر ده إختراع فاشل مكانوش بيستخدموه زمان ولا حيستخدموه فى المستقبل و إن العيب فينا إحنا اللى مش عارفين نكتب من غير سطور . . . و أنا من هذا الموقف أطالب بإلغاء السطور من كل الكراسات لأتها سبب نكبة التعليم المصرى . . . قولوا ورايا فليسقط السطر


معلش صدعتكم و طولت عليكم المرة دى . . . بس دى عقدة نفساوية من الطفولة . . . و ليكن شعارنا فى الحياة شيلوا السطور من الكراسات




كان معكم من على أول السطر
محمد السنباطى

السبت، 21 فبراير 2009

تهييس طفل برىء مهيسسسسسس - مذكرات طفل برىء 8


مذكرات طفل برىء



حلقات غير مسلسلة من الذاكرة نعيش معها أيام الطفولة البريئة . . . أحيانا (؛


عندما تشتد المحن و الأزمات ، تطفو على السطح بعض الذكريات . . حلوة . . مرة . . مضحكة . . محزنة . . . تننتزع الأهات أو الضحكات . . . عندها أتذكر إبتسامات طفل برىء ولى عليه الدهر و فات !!!!


8

تهييس طفل برىء


أكيد كلنا و إحنا صغيرين و بإعتبارنا كنا أطفال براء - دى جمع برىء - كان فى حاجات غريبة و أسئلة عجيبة مريبة بتدور فى دماغنا . . . و ساعات كتير كنا بنكسل نسأل الكبار . . . و ساعتها بنرتكب الخطيئة الكبرى . . . نبدأ نفكر و نشغل دماغنا . . . و تفضل دماغنا تلف و تدور . . . لحد ما نلاقى إجابة نقتنع بيها . . . وطبعا كنا بنوصل لنتايج تهيسية بريئة بحتة . . . و كما قال الشاعر الجاهلى "مساطيل من يومنا ولله و دماغنا مهيسة" . . . الحلقة دى جست فور تهيييسسسسسس


*1*

التليفيزيون و الفرجة على الإعلانات و الأفلام العربى اللى بتنمى الذكاء بشكل فاحش . . . خلتنى أفكر يا ترى الناس دى صغرت و دخلت جوه التليفيزيون إزاى ؟؟؟ . . .كنت كتير أوى أحاول ألف التليفيزيون و أبص من الفتحات اللى ورا . . . حاولت كتير أشوف فى إيه جوه بس الدنيا كانت ضلمة . . . فكرت مرة أفتح التليفيزيون بس منفذتش و الحمد لله . . . و فى الأخر تفكيرى توصل لحل عبقرى إن أكيد مفيش ناس صغيرة جوة عشان لو كان فى ناس فعلا كنت شفتهم و هما طالعين منه بعد ما أطفى التليفيزيون
! ! !

*2*

بنزين 80 و بنزين 90 . . . كنت بشوف الكلمة دى كتيير على محطات البنزين . . . بس اللى كان شاغلنى إيه الفرق بين الإتنيين ؟؟؟ . . . و بعد تهييس عميق وجدتها . . . بنزين 80 بـ80 قرش و بنزين 90 بـ90 قرش
! ! !

*3*

أكيد أكيد أكيد كل الناس اللى فى الدنيا أتخرجت من كليات . . . دى حاجة كنت واثق فيها مليون فى المية و أنا صغير . . . الدكتور من كلية الطب و الصيدلى من كلية الصيدلة و المهندس من كلية الهندسة حتى الممثلين كنت عارف إن ليه كلية بس مكنتش عارف إسمها . . . و طبعا كان فى كلية للزبالين أمال هما بيشتغلوا كده من غير شهادة . . . السؤال اللى كان محيرنى هو الزبال معاه بكاليريوس وللا ليسانس ؟؟؟ . . . و حتى الأن لم أجد إجابة
! ! !

*4*

سؤال زكى جدا 1 . . . إزاى فريد الأطرش كان بيسمع نفسه وهو بيغنى ؟؟؟
سؤال زكى 2 . . . إزاى هدى سلطان كانت أخت محمد فوزى ؟؟؟
إجابة سؤال زكى 1 . . . سبحان الله
إجابة سؤال زكى 2 . . . كانوا إخوات فى الرضاعة
! ! !

*5*

لما تتاوب حط إيدك على بقك و قول أعود بالله من الشيطان الرجيم . . . سألت الميس فى المدرسة سؤال برىء : ليه بنحط إيدينا على بقنا ؟؟؟ . . . جاوبتنى الميس : عشان لما تتاوب و أنت بتفتح بقك الشيطان حيخش جوه . . . مرة نسيت أحط إيدى على بقى و أنا بتتاوب و كنت واثق إن الشيطان جوه بقى . . . السؤال دلوقتى لو بلعت ريقى أو إتنفست الشيطان حيروح فييييييييييين ؟؟؟
! ! !

*6*

المعضلة العلمية الرهيبة اللى قعدت أفكر فيها أكتر من شهرين . . . فانتا بطعم البرتقان . . . سبرايت بطعم الليمون . . . كوكاكولا بطعم إيه ؟؟؟ . . . لازم أدور على فاكهة سودا و طعمها يشبه الكولا . . . و بعد شهرين وجدتها . . . الكوكاكولا بطعم البلح الأسود
! ! !

*7*

الفلوس تحت البلاطة . . . مخبى الفلوس تحت البلاطة . . . محوش الفلوس نحت البلاطة . . . الكلمة دى سمعتها مليون مرة فى مليون فيلم عربى . . . يبقى أكيد دى حقيقة لا شك فيها و لا جدال و لا مراء . . . كان فى بلاطة ملخلخة فى أرض المطبخ . . . كنت بحاول أشيلها عشان أخد الفلوس من تحتيها . . .بس هما شكلهم كانوا مركبين عليها قفل
! ! !

خلاص أنا حرمت . . . مش حشغل دماغى تانى



كان معكم طفل برىء و مهيسسسسسسسس